vituko vya wakunga 2

SAKATA LA MJAMZITO KUJIFUNGULIA KICHAKANI,MUUGUZI ATOWEKA KITUONI,
Na Anthony Mayunga-Serengeti.

SIKU chache tu baada ya sakata la muuguzi wa Zahanati ya Maji moto
kata ya Busawe wilayani hapa Devotha Thomasi kumfukuza mjamzito na
kujifungulia kichakani,ametoweka kwa muda wa siku nne zahanati
haijafunguliwa.

Kitendo hicho kinachoendelea kuwatesa wakazi wa kata hiyo ambao
wanategemea Zahanati hiyo kwa ajili ya huduma ,licha ya kuwepo
matatizo mengi ya kiutendaji.

Mwananchi Jumapili ilielezwa na Mwenyekiti wa serikali ya kijiji hicho
Johannes Masirori kuwa muuguzi huyo alitoka siku moja tu baada ya tume
iliyoundwa kumchunguza kumaliza mahojiano.

Alisema kuwa toka julai 7 hakuna huduma inayotolewa hapo na hawajui
muuguzi yuko wapi kwa kuwa amekuwa na tabia ya kutoka bila kuagakwa
madai kuwa hawajibiki kwao

“Hapa unadhani nchi haijapata uhuru,maana huduma za afya kama
inavyohubiriwa na viongozi ni tatizo kubwa sana,watu wanafika
kulalamika kwa kukosa huduma,wanalazimika kwenda Iramba zaidi ya
kilometa 30 ,wilaya inajua kilio chetu lakini hawajachukua
hatua,”alisema.

Alibainisha kuwa Zahanati hiyo inategemewa na vijiji vingi ,kufungwa
kwake kunazidi kuwatesa wagonjwa,hasa wanawake wajawazito na watoto
chini ya miaka mitano.

Alisema kuwa kwa kuwa huduma hiyo ni ya msingi sana kwa jamii ,uongozi
wa wilaya unatakiwa kuchukua hatua za makusudi kuhakikisha wanaachana
na tabia ya kulindana bali uwajibikaji.

“Sijui kwa nini wanalinda kwenye maisha ya watu,hilo lililotokea ni
moja tu likajulikana ,yapo mengi makubwa yanajitokeza hajawekwa
wazi,hivyo uwajibikaji utaaidia kunusuru maisha ya watu,”alisema
Mwenyekiti.

Alipotafutwa na Mwananchi jumapili kwa njia ya simu muuguzi huyo
alikiri kutokuwepo kituoni hapo mpaka jumatatu julai 12.

“Niko Mugumu nimekuja kwa matatizo ,nimefunga kwa sababu niko mwenyewe
sasa nitafanyaje mimi,ni kwa sababu ya matatizo yaliyojitokeza
kazini,”alisema.

Kuhusu matatizo yaliyojitokeza kituo kwake alikiri kuwa tume imeundwa
kumchunguza ,lakini anadai yamebebwa na masuala ya siasa kwa kuwa mme
wake anatarajia kugombea udiwani mwaka huu.

“Ni kweli huyo aliyepata matatizo alikuja kwangu nilimwelekeza aende
kituo cha afya Iramba ,kwa kuwa mimba ilikuwa changa na matatizo
,baadae nikasikia mambo kuwa nimemfukuza,”alisema.

Aliongeza kuwa tatizo hilo lilijitokeza kutokana na kuwa mmoja hapo na
kuwa walimkuta akiwa chumba cha chanjo,na kushindwa kuwahudumia na
kuwaelekeza eneo husika,”mimi nasema siasa inaniumiza maana hili
natengenezewa tu,”alidai.

“Kwa kweli mimi ninapata shida sana,niko pekee yangu nimeomba tuwe
wengi,maana naumwa Bp hupanda kila wakati nashindwa kufanya
kazi,lakini wanasema kuwa mimi nawapiga vita wanaoletwa hapa ili niwe
pekee yangu,”alilalama.

Alikiri baada ya sakata hilo tayari ofisi imempanga muuguzi mwingine
kwenda kituoni hapo na ataripoti julai 12 ,kutoka zahanati ya Maburi.
Kuhusu kutumia muda mwingi kufanya kazi zake za kuuza dawa .alidai
kuwa anaifanya baada ya masaa ya kazi ,”duka ninalo lakini nafanya
baada ya masaa ya kazi,”alisema.

Mkurugenzi mtendaji wa halmashauri hiyo Kimulika Galikunga,Mganga mkuu
Dk Salum Manyatta,na katibu wa afya wa wilaya Peter Shilingi
hawakupokea simu zao licha ya kuita kwa muda mrefu ili kutoa ufafanuzi
huo.

Juni 28 mwaka huu muuguzi huyo anadaiwa kumfukuza Esther Thadeus
aliyefika zahanati hapo kwa ajili ya kujifungua,na kulazimika
kujifungulia kichakani ambapo mtoto alifariki muda mfupi kutokana na
kukosa huduma.

Tukio hilo liliibuliwa na Mwenyekiti wa serikali ya kijiji hicho na
kutaarifu uongozi wa wilaya waliolazimika kuunda tume ya uchunguzi
,ambayo haijatoa majibu.

Juhudi za kuwasaka zinaendelea ili kupata majibu ya tume na msimamo wa wilaya .
Mwisho.

Visa vya Wakunga

MJAMZITO ANYIMWA HUDUMA ,AJIFUNGULIA KICHAKANI ,MTOTO AFARIKI BAADA YA
MUDA MFUPI,
Na Anthony Mayunga-Serengeti.
MJAMZITO mmoja mkazi wa kijiji cha Maji moto kata ya Busawe wilayani hapa Esther Thadeus amelazimika kujifungulia kichakani baada ya kunyimwa huduma na muuguzi wa zahanati ya kijijini hapo na kupelekea mtoto kufariki muda mfupi baada ya kujifungua.
Tukio hilo ambalo limewastua watu wengi linadaiwa kutokea juni 28 mwaka huu majira ya saa 7 mchana na linadhihirisha kuwa vifo vingi vya wajawazito na watoto wadogo kutokana na utendaji mbovu wa wauguzi na wakunga.
Akisimulia mkasa huo ambao umelaaniwa na wakazi wa kijiji hicho Mwenyekiti wa serikali ya kijiji hicho Johanes Masirori alisema,tukio hilo lilifanywa siri kubwa na uongozi wa zahanati hiyo na hivyo
hakuweza kujua mapema.
"Nilipata taarifa julai saba nikafuatilia mama aliyepata matatizo na mashuhuda wakaniambia,muuguzi alipoulizwa alionekana kuwa na jeuri ile ile wala hajutii kitendo hicho,nilimtaarifu Mkurugenzi mtendaji juu ya tukio hilo,"alisema.
Mwenyekiti huyo alisema kuwa Mama huyo inadaiwa alifika zahanati hapo akiwa tayari katika hatua ya kujifungua ,lakini muuguzi huyo ambaye yukopekee yake alidai hana nafasi ya kumhudumia.
"Akina mama walimsihi amsaidie mwenzao ,lakini majibu yake yanadaiwa yalikuwa mabaya ,kwamba wasome nao waweze kumsaidia maana yeye ana kazi zake,"alibainisha.
Kutokana na majibu hayo mama huyo alizidiwa na kufikia hatua ya kuhisi haja kubwa ndipo akaenda kichakani ,kabla ya yote akajifungua huku akisaidiwa na wanawake wenzake.
"Hawakuwa na vifaa hivyo walihangaika sana ,maana kondo la nyuma liligoma kutoka,wengine wakalazimika kutafuta wembe madukani ,hata hivyo mara baada ya kutoka kwa mtoto aliaga dunia kutokana na kile kinachodaiwa kuzidiwa kwa kushindwa kutoka mapema,"alisema Mwenyekiti.
Hata hivyo licha ya tatizo hilo kujitokeza muuguzi huyo Devota Thobias hakuweza kumhudumia hali iliyopelekea waende nyumbani kisha kumpeleka kituo cha afya cha Iramba kwa ajili ya matibabu zaidi.
Akizungumzia utendaji wa muuguzi huyo Mwenyekiti alisema kuwa yupo hapo toka mwaka 1984 na ameolewa na aliyewahi kuwa diwani wa kata hiyo ,hivyo anafanya kazi kadri anavyojisikia wala si utaratibu.
"Malalamiko ni mengi juu ya utendaji wake ,anachukua muda mwingi kuuza duka lake la dawa ,wagonjwa mpaka wamfuate kwake hata muda wa kazi,anatuhumiwa kuuza kadi kwa wajawazito ,kuwatoza fedha hata watoto chini ya miaka mitano,tumelalamika hakuna utekelezaji,"alisema.
"Kuna madai hata ya upotevu wa dawa katika zahanati yetu katika mazingira tete,kumbe anahamisha na kuuza dukani kwake,wakuu wake wanaambiwa lakini hakuna hatua yoyote,"alisema.
Alisema Mkurugenzi julai 6 mara baada ya kupata taarifa aliunda tume iliyoundwa na Shadraka Isalo Mwenyekiti,Peter Shilingi katibu wa afya wilaya,Muuguzi mkuu Nyeura,na Winifrida Mwolo mkuu wa kitengo cha mama na mtoto ambao julai 7 walianza kazi yao.
Mkurugenzi mtendaji Kimulika Galikunga alipotafutwa kwa njia ya simu licha ya kuita hakuweza kupokea,na hata alipotumiwa maswali kwa njia ya ujumbe hakuweza kujibu.
Naye muuguzi huyo anayetuhumiwa na sakata hilo alipotafutwa kwa njia ya simu yake ya mkononi hakuweza kupokea licha ya kuita kwa muda mrefu.
Baadhi ya wakazi wa Iseresere kata hiyo ambao wanatembea kilometa zaidi 17 kufika zahanati hapo ,tena wakitumia usafiri wa mikokoteni ya ng'ombe kupeleka wajawaito walidai kutokana na huduma mbaya hujifungulia majumbani .
Walisema kuwa vifo vya wajawazito na watoto wadogo ni vingi kwa kuwa wanalazimika kusafirisha wajawazito kwenda kituo cha afya Iramba ama hospitali ya mkoa Musoma badala ya kwenda hapo kutokana na huduma mbaya.
Juhudi za kumsaka mama aliyepata matatizo na muuguzi huyo zinaendelea ili kujua kwa undani mkasa huo unaokinzana na mikakati ya serikali ya kuhakikisha wanapunguza vifo vya wajawazito na watoto chini ya miaka mitano.